Povratak na arhivu

Pjesme Đurđe Lovrenčić

autor: Đurđa Lovrenčić, 13. lipnja 2016.

Preluknjani pejzaž II

Mesec, kak krafljin, zažarjeni na nebu,

Svieklem rubem znatiželje,

Copra i čutnje, osluškuje sviet.

Ober njega anjzec oblake

I de teri kries zvezdah

Posejaneh na brege trudne.

Ni htiča, ni miša, ni čoveka

H mehkuoče nočne

Ke nas želju obvija.

Zvoni mobitel

Zbornik “Zeleni bregi Zeline”, 24. recital suvremenog kajkavskoga pjesništva “Dragutin Domjanić”, Zelina 2005., Mala biblioteka “Dragutin Domjanić” knjiga br. 36

Nagrada za pjesničku minijaturu

 

 

Maslački

Zvuzlana piknja

H vesmiru nori.

***

Zadišala trava pretuljetna.

Sunce svoju decu

Po traniku sieje.

Pak se smieje.

Zbornik “Zeleni bregi Zeline”, 28. recital suvremenog kajkavskoga pjesništva “Dragutin Domjanić”, Zelina 2009., Mala biblioteka “Dragutin Domjanić” knjiga br. 54

Nagrada za pjesničku minijaturu

 

 

Preja rieči

Nie dan, nie noč,

Zorja moja žareča,

Nie sunce, nie mesec,

Senja moja trepeča.

H noči zvezde

Visoke i nieme,

H danu žutoga

Maslačka seme.

I jas, negde delje,

Skrita h meje,

I jas, negde gere,

H rieči preje.

 

Zbornik recital kajkavskog pjesništva “Preja rieči” Krapina, 2012.

Motivacijska nagrada

Biele špice na černa kiklja

Brižni persti znucani h delu

Prek miljejčeka h krilu hbrajaju zorje.

Černe su kiklje babeke po svietu,

Faldami gljibuoki kak plug da je orje.

Pomajčeke prebiraju sukanca h ruke,

Trudnoga diena te muštraste tenje,

Černe su kiklje babeke po svietu,

Beljine je h čipkah se menje i menje.

Beljina se hbirje h oči i lasi

Popletena kak nitje mesečine h kmice.

Černe su kiklje babeke po svietu,

A h falda maljičke ruke senjaju svoje špice.

 

XXI. festival kajkavske lirike i glazbe “Kaj u Kustošiji”, Zagreb 2012.

Nagrada za najuspjeliji pjesnički uradak

Vert van mere cajta

Bumbar hranja h cviet zvončeka

Pak cimba bielji zvuonec žutoga praha.

Puoljek, germ bituonik, ruozi kak same sunce zalazeče,

Puol h cvietu, puol zaprieti kak kugljice sladoleda.

Za meju jagode črljene, husne, cukrene duhe,

A sret gredic mladoga verta

Breskva bes ljistja, betežna, skoram suha,

Sterši h nebe.

Ogerčem germ ivanjčic rukami,

Stežem mlade pupe špagu,

A spot germa spi naranđasti, guolji puž

I h vlage čaka kmicu.

Kranjice su još bes cvieta, kose posiejane na grede.

Dvie htice poprek letiju h zahoj neba,

Piesi lajeju h boksu, mački su prevernulji prazen hamper,

Klepeče signal na križišču štreke.

Tam h daljine, prek potoka, teretnjak se vlječe.

Elji nekak čutim da bi denes mogla pustiti

Cugu da otpelja suobu se merljive cajte.

 

III. festival dječjeg i odraslog kakavskog stvaralaštva “Pod murvu na Krče”, Adamovec 2013.

Treća nagrada žirija

Stiham se dotepla h vuhe

Stiham se dotepla h vuhe, druobna, mila, pak-pak veča,

Stiham se dotepla h vuhe, zvuonka da-da, da sam šumeča.

Kak ščuđeči fuček vesmira, bistrina gljipše nekakve nutrine,

Stiham se dotepla h vuhe. Je me našla, zacuopanu h samine.

Ke na vagu ju je dele h danu da sam se rodila?

Stiham se dotepla h vuhe, zamusikana je z menu bila.

I nič drugoga nie nam bile nek si zdrieti gerle suhe.

Još ju iščem, još trepeče, još mi stiham žuglja vuhe.

 

Zbornik 15. recital duhovno-refleksivne poezije “Josip Ozimec”, “Došel bum v Bistricu”, Marija Bistrica 2013.

Prva nagrada Kaj

 

 

Vuzel paučine

Cimba još se kiesne cvietje,

Nuoč prizivlje sipek snieg,

Šumem sravlja spat se bietvje,

Smert bu bila pričin, bieg,

Tam de nišči rad ne navre,

De se merzle gerči h tielu,

Potem suhe so se zavre

Pot ponjavu, mehku, bielu.

Elji cviet se znuovič zraši

Meden prie nek rieči zvlječe,

Krug tie nazaj brega splaši

Zelen ves da zadrgeče,

Saf od tienke, zlata preje,

Kerhka vuzla paučine.

Zvežeju se zdavnja meje.

Da do dojde, do da zgine.

 

Zbornik “Zeleni bregi Zeline”, 34. recital suvremenog kajkavskoga pjesništva “Dragutin Domjanić”, Zelina 2015., Mala biblioteka “Dragutin Domjanić” knjiga br. 77

Nagrada Matice hrvatske

 

 

I negde h krugu

Im nemrem duge senjati.

Gniezde se h mene rashaja.

I ljestina me trulji šara,

I sunce je mehke. S kraja.

Im nemrem duge senjati.

H lagužaru zaviešenu spim.

Zabljeni jesme na kljinu stene

Pak sienu se njegvu okuol vertim.

Zadene se negda za oblačine,

Preskoči večnost da nie joj stati.

Verteči h začetku, verteči na kraju.

I negde h krugu, male senjati

 

Zbornik 17. recital duhovno-refleksivne poezije “Josip Ozimec”, “Došel bum v Bistricu”, Marija Bistrica 2015.

Treća nagrada Kaj

O AUTORICI

Đurđa Lovrenčić rođena je 22. travnja 1972. godine. Osnovnu školu završava u Svetom Križu Začretje, a Srednju pedagošku školu u Zaboku. 1994. godine završava Višu geodetsku školu, a 2010. godine Geodetski fakultet u Zagrebu. Zaposlena je u struci.
Prvu pjesmu na kajkavskom objavljuje u Zborniku XIV Recitala suvremenog kajkavskog pjesništva „Dragutin Domjanć“ u Zelini 1995. Od tada sudjeluje na recitalima kajkavskog pjesništva u Zelini, Bedekovčni, Mariji Bistrici, Krapini, Varaždinu, Kustošiji, Adamovcu. Prvu zbirku poezije „Guste žuti maslaček“ objavila je 2014. godine.